یادداشت: تاوتوێکردنی زیادبوونی کردەوە تیرۆریستییەکان لە پارێزگای دەرعا
ناوچە جۆربەجۆرەکانی پارێزگای دەرعا لە ساڵانی ڕابردوودا بە تایبەت لە چەند مانگی ڕابردوو ڕۆژانە نائارامی بەخۆیەوە بینیوە. بڵاوبوونەوەی تیرۆر و نائەمنی لە سەرتاسەری پارێزگاکەدا بە ڕوونی کاریگەری لەسەر چالاکیی ئابووری و ژیانی خەڵک داناوە و نەبوونی ئاسۆیەکی ڕوون بۆ کۆتایی هاتنی نائەمنی، هانی کۆچکردنی بەشێکی زۆر لە دانیشتوانی ئەم پارێزگایە دەدات.
ناوچەکانی باشووری سوریا لەوانە پارێزگاکانی سوەیدا و دەرعا، هەمیشە جێی سەرنجی دەزگاکانی سیخوڕی بوون. گرنگی ئەو ناوچانە بووەتە هۆی ئەوەی کە دەزگا سیخوڕییەکان بە پشتیوانی و ڕێنمایی گرووپە تیرۆریستییەکان بە ئامانجی درێژەدان بە نائەمنی و زیادبوونی نائارامی لە دەرعا، بە شێوەیەکی ڕاستەوخۆ و ناڕاستەوخۆ لە ناوچەکە ئامادەبن.
ساڵی ڕابردوو پارێزگای دەرعا پەیوەستبوونی زۆرێک لە چەکدارەکان بە پلانی ئاشتەوایی نیشتمانی و ڕێککەوتن لەگەڵ سوپای سوریا بە نێوەندگیری ڕووسەکان بەخۆیەوە بینی، بەڵام سەرەڕای ئەمەش نائەمنی و تیرۆرکردن بەرامبەر بە هێزەکانی سوپای سوریا و چەکدارانی پێشوو لە پارێزگای دەرعا بەردەوامە. جێبەجێکردنی پلانی ئاشتەوایی لە ناوچە جیاوازەکانی دەرعا و قبوڵکردنی مەرجەکانی حکومەتی سوریا لەلایەن ژمارەیەکی زۆر لە خەڵکی چەکدارەوە بووەتە هۆی پچڕانی هاوپەیمانی نێوان چەکداران و ئەم هۆکارەش لەگەڵ هەندێک هۆکاری تردا، وایکرد زۆرێک لە ئەندامە چەکدارەکان بچنە ناو گروپی تیرۆریستی داعشەوە.
بەو پێیەی پارێزگای دەرعا هاوسنوورە لەگەڵ ئوردن و جۆلانی داگیرکراو، و کەشێکی نائەمن و گونجاوی بۆ بوون و ڕێکخستن و چالاکیی داعش لە هەندێک ناوچەی ئەم پارێزگایە هەیە، گرووپی داعش بە ڕێکخستنی ئەندامانی نوێ و ناردنی فەرماندەی مەیدانی بۆ ئەم پارێزگایە، بوونی خۆی زۆر بەهێزتر کردووە. پرسێک کە لەم دواییانەدا خۆی لە زیادبوونی هێرشەکانی داعش بۆ سەر هێزە ئەمنییەکان و سوپای سوریا لەو ناوچانەدا نیشانداوە.
هەروەها سوپا و دەزگا ئەمنییەکانی سوریا بە زانینی ئەم بابەتە، و ئەنجامدانی ژمارەیەک ئۆپەراسیۆنی ئەمنی دژ بە ئەندامانی داعش لە ناوچە جیاجیاکانی پارێزگای دەرعا، لەوانە شارۆچکەی موزیرب و گەڕەکانی دەرعا ئەلبەلەد و ئەلسەد لە شاری دەرعا، چەندین سەرکردە و فەرماندەی مەیدانی گروپی تیرۆریستی داعش کوژرا و ژمارەیەکیش دەستگیرکران.
ئۆپەراسیۆنەکانی سوپا و هێزە ئەمنییەکانی سوریا تەنها بۆ ماوەیەکی کورت فاکتەری ئەمنی پارێزگای دەرعا زیاد دەکات و دوای تەنها چەند ڕۆژێک لە ئۆپەراسیۆنی سوپای سوریا، هێرشە تیرۆریستیەکان لەم پارێزگایە دەست پێدەکاتەوە. ئاماری هێرشە تیرۆریستییەکانی ئەم پارێزگایە و شکستی ڕێژەیی سوپای سوریا لە مامەڵەکردن لەگەڵ ئەم کردەوانەدا دەریدەخات کە سەرەڕای ئۆپەراسیۆنە بەردەوامەکانی سوپای سوریا لە پارێزگای دەرعا، شەڕی تیرۆریستانی داعش یان گروپە چەکدارەکانی دیکە پێویستی بە گۆڕینی پلان و جێبەجێکردنی تاکتیکی سەربازی گونجاو و نوێیە.
زیادبوونی تیرۆر و نائەمنی لە پارێزگای دەرعا، بە توندی کاریگەری لەسەر چالاکیی ئابووری و ژیانی خەڵک دروست کردووە و نەبوونی ئاسۆیەکی ڕوون بۆ کۆتایی هاتنی نائەمنی لەم پارێزگایە، جگە لە ترس و ناڕەزایەتی جەماوەری، هانی بەشێکی زۆر لە دانیشتووانی ئەو پارێزگایە بۆ کۆچکردن دەدات. چارەسەرکردنی ئەم پرسە و گرفتەکانی دیکەی هاوشێوە تەنها بە دامەزراندنی سەقامگیری ئەمنی و ڕووبەڕووبوونەوەی سەرکەوتووانەی حکومەتی سووریا لەگەڵ گرووپە تیرۆریستییەکان لە پارێزگای دەرعا بەدەست دێت و ئەم پرسەش پێویستی بە فەرمانی فەرماندەکان و جێبەجێکردنی تاکتیکی گونجاو لە لایەن سوپای سوریاوە هەیە.
دەربارەی نووسەر:
لێدوانەکان