دوایین هەواڵەکان لە میحوەری پەنجشیری ئەفغانستان، ٦ی ئەیلولی ٢٠٢١

دوو شه‌ممه‌ 6 ئه‌یلول 21 - 11:47
https://kurdish.iswnews.com/?p=3868

هەواڵەکانی جیهانی ئیسلام: پارێزگای پەنجشیر بە تەواوی لەلایەن تاڵیبانەوە کۆنترۆل کرا.

دوای چەندین ڕۆژ شەڕ و پێکدادانی قورس لەنێوان چەکدارانی تاڵیبان و هێزەکانی ئەحمەد مەسعود لە پارێزگای پەنجشیر، کۆنترۆلی شارۆچکەکانی پەنجشیر و شارۆچکەکانی دێ سەلاح، پۆل حسار و ئەندراب لە پارێزگای بەغلان کەوتە دەست تاڵیبانەوە.
لە ئێستادا هێزەکانی ئەحمەد مەسعود پەنایان بۆ چیا و کوێستانەکانی پەنجشیر بردووە و لە چارەنووس و شوێنی ئەحمەد مەسعود هیچ هەواڵێک لەبەر دەستدا نیە.

لە شەڕی قورسی ڕۆژی رابردوو کە لە دەوروبەری روخێ و خنج ڕوویدا، ژمارەیەک لە فەرماندە مەیدانییەکانی ئەحمەد مەسعود کوژران و هێڵە بەرگریکارەکانی ئەو هێزانە لە پەنجشیر هەڵوەشایەوە. دوای هەڵوەشانەوەکە، چەکدارانی تاڵیبان توانیان لە شارۆچکەی روخێ بۆ ناو شاری بازارک-ی ناوەندی پەنجشیر پێشڕەوی بکەن.

دەوترێت “فەهیم دەشتی”، وتەبێژی هێزەکانی ئەحمەد مەسعود (خوشکەزای عەبدوڵڵا عەبدوڵڵا) و جەنەراڵ “عەبدئەلوەدود زێرێ”، ڕاوێژکاری ئەحمەد مەسعود (خوشکەزای ئەحمەد شا مەسعود) لە ئەنجامی هێڕشی فڕۆکەیەکی بێ فڕۆکەوانی نەناسراوەوە کوژراون. هەروەها لە چەند ڕۆژی ڕابردوودا ئەمروڵا ساڵح بۆ تاجیکستان هەڵاتووە و هیچ زانیارییەک لەبارەی شوێنی ئەحمەد مەسعودیش لەبەر دەستدا نیە.

ئەحمەد مەسعود لە دوایین لێدوانەکەیدا پێشوازی لە پێشنیارەکەی ئەنجومەنی زانایانی ئەفغانستان بۆ ڕاگرتنی شەڕ و پێکدادان لە پەنجشیر و گفتوگۆ لەگەڵ تاڵیبان کرد بوو و داوای لە تاڵیبان کرد بوو لە پەنجشیر بکشێنەوە. بەڵام لەبەر کۆتایی هاتنی مۆڵەتی چەکدارانی تاڵیبان بۆ ئەحمەد مەسعود، ئەو چەکدارانە هێرشەکانیان تا کۆنترۆل کردنی تەواوی پەنجشیر رانەگرت.

دوایین هەواڵەکان لە پەنجشیری ئەفغانستان، ٥ی ئەیلولی ٢٠٢١

بەشی بکە:
لێدوانەکان

وەڵامێک بنووسە

پۆستی ئەلکترۆنیکەت بڵاو ناکرێتەوە .