هێرشی فڕۆکە بێفڕۆکەوانی بۆ سەر ناوەندێکی وەزارەتی بەرگری ئێران لە ئەسفەهان + ڤیدیۆ
هەواڵەکانی جیهانی ئیسلام؛ ناوەندێکی وەزارەتی بەرگری ئێران لە پارێزگای ئەسفەهانی ئەم وڵاتە بە هێرشێکی فڕۆکە بێفڕۆکەوان کرایە ئامانج.
وەزارەتی بەرگری ئێران لە بەیاننامەیەکدا ڕایگەیاند کە یەکێک لە بەشەکانی کارگەیەکی ئەم وەزارەتە لە پارێزگای ئەسفەهان بە هێرشی فڕۆکە بێفڕۆکەوانی کراوەتە ئامانج.
لەم بەیاننامەیەدا هاتووە کە نزیکەی کاتژمێر ٢٣:٠٠ شەممە ٢٨ی کانونی دووەم، یەکێک لە بەشەکانی کارگەیەکی وەزارەتی بەرگری لە ئەسفەهان لەلایەن چەند “باڵندەی بچووک(کوادکۆپتەر)”ەوە هێرش کراوەتە سەر.
لە ڕاگەیەندراوی وەزارەتی بەرگری ئێراندا هاتووە: یەکێکیان لەلایەن سیستەمی بەرگریی ئاسمانی تێکشکاوە و دوو فڕۆکەکەی دیکەش لە تەڵەی بەرگریدا گیریان خواردووە و تەقینەوە.
وەزارەتی بەرگریی ئێران هێرشی فڕۆکە بێفڕۆکەوانی بۆ سەر ناوەندەکانی ئەم وەزارەتە لە ئەسفەهان بە سەرنەکەوتوو ناوبرد، و جەختی لەوە کردەوە: ئەم هێرشە شکستخواردووە هیچ زیانێکی گیانی نەبووە و زیانێکی کەمیش بە سەربانی کۆگاکە کەوتووە، کە بە فەزڵی خوا نەبووەتە هۆی هیچ پچڕانێک لە ئامێر و ئەرکەکانی کارگەکە.
لێدوانەکان