هێڵی بەرهەمهێنانی فڕۆکەی بێفڕۆکەوانی ئێرانی ئەبابیل٢ لە تاجیکستان کرایەوە

سێ شه‌ممه‌ 17 ئایار 22 - 22:14
https://kurdish.iswnews.com/?p=12173

هەواڵەکانی جیهانی ئیسلام؛ هێڵی بەرهەمهێنانی فڕۆکەی بێفڕۆکەوانی ئێرانی “ئەبابیل ٢” بە ئامادەبوونی محەمەد باقری، سەرۆکی ئەرکانی هێزە چەکدارەکانی ئێران و جەنەڕاڵ شیر عەلی میرزا، وەزیری بەرگریی تاجیکستان لە دوشەنبە ی پایتەختی تاجیکستان کرایەوە.

بەرەبەیانی ١٦ی ئایار، محەمەد باقری، سەرۆکی ئەرکانی هێزە چەکدارەکانی ئێران بە یاوەری شاندێکی باڵای سەربازی و لەسەر بانگهێشتی فەرمی جەنەڕاڵ شیر عەلی میرزا، وەزیری بەرگریی تاجیکستان سەردانی دوشەنبە ی پایتەختی ئەم وڵاتەی کرد.
سەردانەکە بە ئامانجی جێبەجێکردنی ڕێککەوتنی کۆمیسیۆنی هاوبەشی هاوکاری سەربازی و کۆبوونەوە لەگەڵ بەرپرسانی باڵای سیاسی و سەربازی تاجیکستان ئەنجام درا.
جەنەڕاڵ باقری بە ئاماژە بە سیاسەتی کۆماری ئیسلامیی ئێران بۆ پەرەپێدان بە پەیوەندی لەگەڵ دراوسێکانی و پتەوکردنی هاوکارییە سەربازی و بەرگرییەکان لەگەڵ تاجیکستان وتی: کۆماری ئیسلامیی ئێران و کۆماری تاجیکستان لە ناوچەیەکی جیۆپۆلەتیکیدان و ڕووداوەکان و پێشهاتەکانی هەردوو وڵات کاریگەرییان لەسەر یەکتر دەبێت. لەپێناو باشترکردنی ئاسایش و ئارامی هەردوو وڵات، لە سەردانەکەماندا کۆبوونەوە لەگەڵ بەرپرسانی سەربازی و سیاسی ئەنجام دەدەین و لە داهاتووشدا لە هەموو ئاستەکانی بەرگری سەربازیی نێوان هەردوو وڵاتدا هاوکاری زیاتر دەکەین.

هەر لەم سەردانەدا ژەنەڕاڵ باقری کارگەی بەرهەمهێنان و مۆنتاژی فڕۆکەی بێفڕۆکەوانی ئەبابیل ٢ی ئێرانی کردەوە و بە شێوەیەکی ڕەمزی کلیلی ڕادەستی وەزیری بەرگری تاجیکستان کرد.
لە هۆڵی کارگەکەدا، وێنەی فڕۆکە بێفڕۆکەوانەکانی فتراس و فڕۆکەی بێفڕۆکەوانی وینگ لۆنگ ٢ (دروستکراوی چین) دەبینرێت، بەڵام تا ئێستا هیچ ڕوونکردنەوەیەک بۆ بەرهەمهێنان و بەکارهێنانیان بڵاونەکراوەتەوە.

“ئەبابیل ٢” ناوی یەکێک لە فڕۆکە بێفڕۆکەوانەکانی سیخوڕی و خۆکوژییە کە لەلایەن پیشەسازی فڕۆکەیی ئێرانەوە دروستکراوە و مەودای کارکردنی ١٠٠ کیلۆمەتر و بەردەوامی فڕینی ٧٥ بۆ ١٢٠ خولەکە.

بەشی بکە:
لێدوانەکان

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

رێکلام لە هەواڵەکانی جیهانی ئیسلام