فڕۆکەکانی ئەمریکا چیان لە پەنابەرانی ئەفغانی کرد؟
هێزەکانی ئەمریکا لە کاتی کشانەوەیان لە ئەفغانستان، بە درێژایی دوو هەفتەدا دوای ڕووخانی حکوومەتی ئەشرەف غەنی ١٢٤ هەزار کەسیان لەو وڵاتە بۆ دەرەوە گواستەوە.
دوای ڕووخانی حکوومەتی ئەشرەف غەنی و گرتنە دەستی دەسەڵاتی ئەو وڵاتە لەلایەن تاڵیبانەوە، هەزاران کەس لەوانەی بۆ هێزەکانی ئەمریکا و ناتۆ کاریان کرد بوو، ئامادەی بەجێهێڵانی ئەفغانستان بوون.
وەزارەتی دەرەوە و بەرگری ئەمریکا لە ئۆپەراسیۆنێکی چڕ و لە ماوەی دوو هەفتەدا ئەو کەسانەی کە لە بوارە جیاجیاکان وەک: سەربازی، هەواڵگری و تەکنیکی لەگەڵ ئەوان کاریان کرد بوو، لە ئەفغانستان بۆ دەرەوەی ئەو وڵاتە گواستەوە.
ئەو کەسانە لە رێگەی فڕۆکەخانەی کابوڵەوە بۆ بنکەکانی ئەمریکا لە وڵاتانی ئەڵمانیا، ئیمارات و قەتەر گواسترانەوە کە ژمارەیان نزیکەی ١٢٤ هەزار کەس ڕاگەیەنراوە.
لە کۆی گشتی ئەو کەسانە، ٣٥٠٠ کەسیان ڤیزای هەمیشەیی ئەمریکا هەیە و ٣٦ هەزار کەسیش لە بەرنامەی نیشتەجێبوونی کاتیدا تۆمار کراون.
ئەوانەی تریش گواستراونەتەوە بۆ کامپەکانی ئیمارات و قەتەر و هەوڵی وەرگرتنیان لە وڵاتانی ئەمریکی و ئەوروپی دەدەن.
کشانەوەی ئەمریکا لە ئەفغانستان سەرەتای پێشهاتە نوێیەکانی ئەفغانستان بوو. لە دانوستانەکان لەگەڵ تاڵیبان و ڕووخانی حکومەتی ئەشرەف غەنی دەستی پێکرد و بە هێرشێکی خۆکوژی داعش لە فڕۆکەخانەی کابوڵ کە بە هۆیەوە ١٧٠ کەسی سڤیل و ١٣ سەربازی ئەمریکی کوژران، کۆتایی هات.
لێدوانەکان