باشاغا دیسانەوە نەگەیشتە تەرابلوس!
هەواڵەکانی جیهانی ئیسلام، هەوڵەکانی فەتحی باشاغا، سەرۆکوەزیرانی هەڵبژێردراوی پەرلەمانی لیبیا، بۆ کۆنتڕۆڵکردنی شاری تەرابلوسی پایتەختی ئەم وڵاتە شکستی هێنا.
دوای پێنج ڕۆژ لە گرژی سیاسی و ململانێی چەکداری، سێیەم هەوڵی فەتحی باشاغا بۆ چوونە ناو تەرابلوس شکستی هێنا. لە ئەنجامی ململانێی نێوان لایەنگرانی چەکداری فەتحی باشاغا و هێزەکانی حکومەتی ویفاق سەر بە عەبدولحەمید ئەلدەبیبە سەرۆک وەزیران لە شاری تەرابلوسی پایتەختی لیبیا، زیاتر لە ٣٢ کەس کوژران و ١٦٠ کەسیش برینداربوون، ئێستاش ئەلدەبیبە و باشاغا یەکتر بە دەستپێکردنی ململانێ و کوشتنی لیبییەکان تۆمەتبار دەکەن.
باشاغا لە بەیاننامەیەکدا ئەلدەبیبەی بەوە تۆمەتبارکرد کە حکومەتی رادەست نەکردووە و خوێنی خەڵکی مەدەنی ڕشتووە و ماڵ و موڵکیان تاڵان کردووە. عەبدولحەمید ئەلدەبیبە هەروەها لایەنگرانی باشاغای بە کۆمەڵێک کودەتاچی ناوبرد کە دادگایی کراون. لەم بارەیەوە داواکاری گشتیی سەربازیی لیبیا فەرمانێکی دەرکردووە کە گەشتی باشاغا و ئوسامە جەویلی فەرماندەی چەکدارانی لایەنگرانی باشاغای قەدەغە کردووە.
لە ئێستادا شەڕ و پێکدادان لە تەرابلوس ڕاگیراوە و لە هەندێک شوێن بە شێوەیەکی ناوبەناو ئاڵوگۆڕی تەقە لە نێوان لایەنەکان ڕوودەدات. ناوەند و دەوروبەری تەرابلوس ئارامە و هێزەکانی حکومەتی ویفاق بە کۆنتڕۆڵکردنی ناوچەی ئەلسوانی لە میحوەری باشوری تەرابلوس پاشەکشەیان بە هێزەکانی لایەنگری باشاغا کردووە.
ئەنجومەنی سەرۆکایەتی لیبیا و پەرلەمانی لیبیا و باڵیۆزخانەی وڵاتانی کاریگەر لە لیبیا هەروەها داوای ڕاگرتنی ململانێکان و دۆزینەوەی چارەسەرێکی سیاسی بۆ ئەنجامدانی هەڵبژاردنەکانی سەرۆکایەتییان کردووە.
بە لەبەرچاوگرتنی شکستی فەتحی باشاغا لە وەرگرتنەوەی حکومەت و پایتەخت، ئەگەری دووبارە سەرهەڵدانەوەی ناکۆکییەکان لە لیبیا هەیە. پاڵپشتی ژەنەڕاڵ حەفتەر لە باشاغا دەتوانێت بە جددی کێبڕکێ بگەیەنێتە ئاستی سەربازی و جارێکی دیکە ئەم وڵاتە ببێتە گۆڕەپانی ململانێکان و دەستێوەردانی سەربازی تورکیا، ئیمارات و ڕووسیا.
لێدوانەکان