سەید حەسەن نەسروڵڵا: دەستدرێژی بۆ سەر مزگەوتی ئەقسا دەبێتە هۆی تەقینەوەیەکی گەورە لە ناوچەکەدا
هەواڵەکانی جیهانی ئیسلام؛ ئێواره‌ی ڕۆژی چوارشه‌ممه، سه‌ید حه‌سه‌ن نه‌سروڵڵا سکرتێری گشتیی حیزبوڵڵای لوبنان له ساڵیادی ڕزگارکردنی لوبنان له ڕژێمی زایۆنیستی و ڕۆژی خۆڕاگری وتارێکی پێشکه‌ش کرد.
سه‌ید حه‌سه‌ن له سه‌ره‌تای وتاره‌كه‌یدا، پیرۆزبایی له ساڵیادی رزگاركردنی لوبنان كرد و گوتی: سوپاس بۆ خوا كه به‌ڵێنه‌كه‌ی جێبه‌جێ كرد. ئەم بەڵێنە لە ٢٥ی ئایاردا جێبەجێ کرا. ئەم ڕۆژە یەکێکە لە ڕۆژە ئیلاهییەکان و بەشێکە لەو ڕۆژانەی کە بەڵێنی خودای گەورە بۆ موجاهیدەکان هاتە دی. سوپاس بۆ خوای گەورە کە ئێمەی بەرەو بژاردەی خۆڕاگری برد. ئێمە نە چاوەڕێی رژێمێکی عەرەبی، نە نەتەوە یەکگرتووەکان و نە ئەنجوومەنی ئاسایشمان نەکرد.
نەسروڵڵا سوپاسی ئەو هێزانەی کرد کە بۆ رزگارکردنی لوبنان فیداکاریان کرد بەتایبەت شەهیدان و بنەماڵەکانیان و وتی: سوپاسی برینداران دەکەین بۆ ئەو کارانەی کە کردیان و ئەو زیندانیانەی کە ساڵانێک لە زیندانەکانی داگیرکەران بەسەریان برد. هه‌روه‌ها سوپاسی موجاهیدین ده‌كه‌ین كه گه‌نجاتیان له مەیدانەکانی جیهاد بەسەر برد و سوپاسی خه‌ڵكی خۆڕاگری لوبنان دەکەین. هه‌روه‌ها سوپاسی سوپای لوبنان ده‌كه‌ین، به‌تایبه‌تی بۆ كرده‌وه‌كانیان له ساڵانی کۆتایی سەدەی ٩٠دا، بۆ هاوسۆزییان له‌گه‌ڵ خۆڕاگری، هه‌روه‌ها سوپاسی سوپای سووریا و گروپه خۆڕاگرییه‌كانی فه‌له‌ستین ده‌كه‌ین.
ئەمینداری گشتی حزبوڵڵای لوبنان سوپاسی فەرماندەکانی خۆڕاگری کرد و وتی: سوپاسی کۆماری ئیسلامیی ئێران بۆ هاوکارییەکانی دەکەین. هاوكارییەکانیان لە هیچ كەسێک شاراوە نییە، بە تایبەت ئەو رۆڵەی شەهید حاج قاسم سولەیمانی گێڕاوە.
جەختیشیكردەوە: دەبێت لوبنانیەكان رووی راستەقینەی رژێمی زایۆنیستی بناسن. هەموو ئەو قوربانیانە دەبێت لەبیر بمێنێتەوە چونکە ئەم سەرکەوتنە بەخۆڕایی بەدەست نەهاتووە، بەڵکو بە خوێن و فرمێسک و دەست و پەنجە لەسەر چەک و عەقڵ و دڵ و ئیرادە بەدەست هاتووە. دەبێت ئەوانە بناسێنرێن کە بەرەنگاری داگیرکەران بوون، هەروەها ئەوانەی پیلانگێڕییان لە دژی خەڵکی زێدی خۆیان کرد.
نەسروڵڵا لە درێژەی قسەکانیدا وتی: سەرکەوتنی ساڵی ٢٠٠٠ وێنەی ئەو سوپایە نەدۆڕاوەی شکاند، دوا بزماری بە تابوتی پلانی” ئیسرائیل”ی گەورە دا و جارێکی دیکە هیوای بە گەلی فەلەستین بەخشی بۆ ئازادکردنی خاکەکەیان.
ئەمینداری گشتیی حزبوڵڵای لوبنان زیادی کرد: وتەی “ماڵی جاڵجاڵۆکە” برینێکی قوڵی لە مێشکی سەرانی ڕژێم و سوپاکانیان بەجێهێشتووە. ئاراستەی هێز لە ڕژێمی زایۆنیستی لە دوای شکستی ساڵی ٢٠٠٠ لە لوبنان ڕووی لە کەمبوونەوە کردووە، کە بنیامین ناتانیاهۆ، سەرۆکوەزیرانی پێشووی ئەم رژێمە دانی پێدا ناوە.
ڕاشیگەیاند: تاکە خۆڕاگریەک کە سەرکەوتنی بەدەست هێنا و حوکمی نەکرد، خۆڕاگری لوبنان، بەتایبەتی حزبوڵڵای لوبنان بوو. ئێمە ئەمەمان نەویستووە چونکە خەباتمان بۆ دەسەڵات نەکرد، بەڵکو بۆ ڕزگارکردنی خاک و خەڵک و بۆ کەرامەتی نەتەوەیی خەباتمان کرد. کاتێک چووینە ناو حکومەتەوە بۆ پاراستن و پشتیوانی لە خۆڕاگری ئەم کارەمان کرد، کاتێک بووینە بەشێک لە حکومەت، بەدواداچوونمان بۆ کاروباری خەڵک کرد.
سەید حەسەن ئاماژه به بارودۆخی ناوچەکە وتی: له چەند رۆژی داهاتوودا رەنگە چەند رووداوێکی لە فەڵەستین ڕووبدات و ئەو رووداوانه رەنگە تەقینەوەیەکی گەورەی لێبکەوێتەوە. ئەمە ڕاستییە. ڕێپێوانی ئاڵای ئیسرائیلییەکان ئیستفزازییەکی گەورەیە و شاهیدی چەندین بانگەواز بۆ لەناوبردنی “قبه‌الصخره” بووین. خۆڕاگری فەلەستینەکان لەسەر وەڵامدانەوە کۆ دەنگیان هەیە و لەوانەیە ڕووداوەکان وەک تەقینەوەیەکی گەورە لەناو فەلەستین بێت.
ئەمینداری گشتیی حزبوڵڵای لوبنان هۆشداریدا: هەر كارێك لە دژی مزگەوتی ئەقسا و قبه‌الصخره، تەقینەوەیەكی گەورە لە ناوچەكەی لێدەكەوێتەوە. دوژمن لە دۆخێکی مەترسیداردایە و لە ناوەوە ڕووبەڕووی دووبەرەکی توند بووتەوە.
نەسروڵڵا لە درێژەی قسەکانیدا وتی: داواتان لێدەکەم ئاگاداری ئەو شتانە بن کە لە دەوروبەرمان ڕوودەدەن و بۆی ئامادەبن. لێکەوتەی مەترسیداری بۆ ناوچەکە دەبێت و بێگومان ئەمەش پەیوەستە بە گەمژەیی دوژمنەوە.
لە کۆتاییدا وتی: مانۆڕی سەربازی ئیسرائیل نزیکەی هەفتەیەکی دیکە کۆتایی دێت و هێشتا لە ئامادەباشی تەواوداین. سڵاو لە ئازیزان و برایانی موجاهیدینی خۆڕاگری لە سنوورەکان دەکەم بۆ سەبر و جیهادیان.
لێدوانەکان