گرنگترین هەواڵەکانی حەفتا و یەکەمین ڕۆژی شەڕ لە ئۆکرانیا، ٥ی ئایاری ٢٠٢٢

سوپای ڕووسیا بە مووشەک هێرشی کردە سەر پردێکی هێڵی شەمەندەفەر لە پارێزگای دنیپرۆپترۆفێسک. بەهۆی هێرشەکە هێڵی شەمەندەفەری لەو ڕێگایە پچڕا.

میدیاکانی ئۆکرانی وێنەی دوو درۆنی ئۆرلان-١٠ی تێکشکاوی سوپای ڕووسیایان بڵاوکردەوە.
یەکەم درۆن لە بەرەی خێرسۆن خراوەتە خوارەوە و وردەکارییەکانی ڕوون نییە. درۆنی دووەم کەمتر زیانی پێگەیشتووە.

تێکشکانی تانکی T-90Mی سوپای ڕووسیا لەلایەن سوپای ئۆکرانیاوە لە پارێزگای خارکیڤ.
تی-90 یەکێکە لە پێشکەوتوترین تانکەکانی سوپای ڕووسیا کە لە ساڵی ١٩٩٣ بەرهەم هێنراوە. تی-90 کێشی نزیکەی ٤٦.٥ تەن دەبێت. زۆرترین خێرایی لەسەر ڕێگاکان ٦٠ بۆ ٦٥ و لە دەرەوەی ڕێگا بۆ ٤٥ کیلۆمەتر لە کاتژمێردایە و مەودای بەکارهێنانی لە ئۆپەراسیۆنەکاندا بە سووتەمەنی تەواو، ٥٥٠ بۆ ٧٠٠ کیلۆمەتر دەبێت.