تویتێکی وەزیری دەرەوەی ئەمریکا لە سەر ساڵیادی تیرۆری خاشقچی کاردانەوەی لێکەوتەوە
تویتێکی ئەنتۆنی بلینکەن وەزیری دەرەوەی ئەمریکا لە ساڵیادی تیرۆری دڕندانەی جەمال خاشقچی ڕۆژنامەنووسی ڕەخنەگری سعوودی لە لایەن محەممەد بن سەلمانەوە، ڕەخنە و کاردانەوەی زۆری لێکەوتەوە.
ئەنتۆنی بلینکەن وەزیری دەرەوەی ئەمریکا لە ساڵیادی تیرۆری دڕندانەی ڕۆژنامەنووس جەمال خاشقچی لە لایەن محەممەد بن سەلمان جێنشینی سعوودیەوە، پەیامێکی بڵاو کردەوە کە تێیدا هاتووە: ” کوژرانی جەمال خاشقچی، 4 ساڵ بەر لە ئێستا، هێرشی سەر ئازادی ڕادەربڕین لە سەرجەم ناوچەکان بوو، خەمی جەمالمان لە دڵدا ماوە و لەوانەش کە بەرگری لە مافی مرۆڤ، ڕۆژنامەنووسان و ئازادییە بنەڕەتییەکان دەکەن، پاڵپشتی دەکەین “.
یەکەم کاردانەوەش لە لایەن خەدیجە چەنگیز هاوسەرەکەی خاشقچی لە کاتی کوژرانیدا بووە کە ڕایگەیاند: پێم وایە دەتوانێت هەندێک کاری زیاتر لە نووسینی یادگارییەک بکەیت.
لە تۆڕە کۆمەڵایەتییەکانیش وێنەی چاوپێکەوتنی وەزیری دەرەوەی ئەمریکا و محەممەد بن سەلمان جێنشینی سعوودیە وەک ناڕەزایەتییەک لە بەرامبەر سیاسەتەکانی ئەمریکا و بانگەشەی مافی مرۆڤ بڵاو بووەتەوە.
ئەوان ڕایانگەیاندووە کە سەردانەکەی جۆبایدن سەرۆک کۆماری ئەمریکا بۆ سعوودیە پاشگەزبوونەوە لەو بەڵێنانە بووە کە سەبارەت بە بەرگری لە مافی مرۆڤ و بەدواداچوون بۆ دۆسیەی تیرۆری خاشقچی دایبوو.
جام کوردی
لێدوانەکان