تەقینەوە لە کابوڵ؛ هێرشی فڕۆکەی بێفڕۆکەوانی ئەمریکا بۆ سەر داعش یان هێرشی پاکستان بۆ سەر جوڵانەوەی تاڵیبان؟
هەواڵەکانی جیهانی ئیسلام؛ بەپێی سەرچاوە خۆجێیەکان، هێرشی فڕۆکە بێفڕۆکەوانە نەناسراوەکان بۆ سەر چەند خاڵێک لە ناحیەی سێیەم و دەیەمی کابوڵی پایتەختی ئەفغانستان بووەتە هۆی چەندین تەقینەوەی بەهێز.
بەرەبەیانی ڕۆژی رابردوو یەکشەممە ٣١ی تەمووز، چەند تەقینەوەیەک ناوچەکانی شیرپور و وەزیری ئەکبەر خان لە شاری کابوڵی هەژاند. بەشێک لە سەرچاوە ناوخۆییەكان پێیان وایە فڕۆكەكانی سوپای پاكستان هێرشیان كردووەتە سەر سێ گردبوونەوەی چەكدارانی تاڵیبانی پاكستان (TTP) و هەندێک سەرچاوەی دیكەی ناوخۆیی باسیان لە سورانەوەی فڕۆكە بێفڕۆكەوانەكانی ئەمریكا لە ئاسمانی كابوڵ كردووە و هۆكاری ئەو تەقینەوەیانەیان گەڕاندۆتەوە بۆ هێرشە ئاسمانییەکانی ئەو فڕۆکانە.
لەلایەکی دیکەوە، رەحمەتوڵڵا نەبیل، بەرپرسی ئاسایشی نەتەوەیی حکوومەتی پێشووی ئەفغانستان، لە هەمان سەرچاوەکانەوە، هێرشە ئاسمانییەکانی ئەمریکای بۆ سەر کابوڵ پشتڕاست کردۆتەوە و رایگەیاندووە: «بەپێی ڕێککەوتنی دۆحە، ئەمریکا لە بەرەنگاربوونەوە و سەرکوتکردنی داعش یارمەتی تاڵیبان دەدات. بەگوێرەی سەرچاوە خۆجێیەکان، بەرەبەیانی ئەمڕۆ فڕۆکە بێفڕۆکەوانەکانی ئەمریکی لە ئاسمانی کابوڵ بینراون و هێرشیان کردووەتە سەر ناوچە جیاجیاکانی شاری کابوڵ. بە ئەگەرێکی زۆرەوە ئامانجی ئەم هێرشانە حەشارگەی داعش بووە. دەبێت تاڵیبان بزانێت ئەگەر پشتگیری ئەفغانییەکان نەکەن حکومەتەکەیان زۆر ناخایەنێت. ئەوان ناتوانن وڵاتەکە بەڕێوەببەن و مەترسییەکی زۆر هەیە ئەفغانستان ببێتە پەناگەیەک بۆ توندڕەوەکان.»
فڕینی فڕۆکە بێفڕۆکەوانە نەناسراوەکان لە کابوڵ و شارەکانی دیکەی ئەفغانستان بابەتێکە کە لە سەرەتای ئەمساڵەوە چەندین جار دووبارە بووەتەوە. ئەم فڕۆکە بێفڕۆکەوانانە پێشتر هێرشیان کردووەتە سەر بنکەی شورابەک لە باکووری ڕۆژئاوای شاری لەشکەرگاهـ و بنکەی تۆحیدئاباد و بنکەی حەیدەرئاباد لە شاری غەزنی و تا ئێستاش وردەکاریی پشتڕاستکراو لە ئەنجامدەر و سەرچاوەی ئەو هێرشانە دیار نییە.
لێدوانەکان