ڕێبەری تاڵیبان: ئەگەر بۆمبی ئەتۆمیش لەدژی ئێمە بەکار بهێنن، بە پێچەوانەی ویستی خودا هەنگاوێک لەگەڵ ئێوە نانێین
هەواڵەکانی جیهانی ئیسلام؛ مەلا هەیبەتوڵڵا ئاخوندزادە، ڕێبەری گروپی تاڵیبان بە بەشداری لە کۆبوونەوەی چەند ڕۆژەی زانایانی ئایینی ئەفغانستان لە ناوچەی پێنجەمی شاری کابوڵ، وتارێکی پێشکەش بە ئامادەبووان کرد.
ڕێبەری تاڵیبان له سەرەتای وتارەکەیدا بە بۆنەی سەرکەوتنی ئیمارەتی ئیسلامی بەسەر حکومەتی پێشوو پیرۆزبایی لە خەڵکی ئەفغانستانی کرد و وتی سوپاسی موجاهیدین، بنەماڵەی کوژراوان و .. دەکەم.
ناوبراو لە درێژەی قسەکانیدا وتی: «شەڕی ئەمریکا لەگەڵ ئێمە بۆ وشکانی و ئاسمان نەبوو، بەڵکو بۆ تیۆری و بیروباوەڕی ئێمە بوو و تا ڕۆژی قیامەت بەردەوام دەبێت. هیچ سازشێک لە نێوان کافر و ئیسلامدا نییە، و نە ڕوودەدات و نە ئەگەری ڕوودانیشی هەیە.
کوشتنی موسڵمانان هەرگیز ئامانجمان نەبووە، بەڵکو تەنها بۆ تۆڵەکردنەوە (قیساس) موسڵمانان دەکوژین. ئەگەر ئەفغانییەکان لە ئۆپەراسیۆنێکدا کوژران، ئەوە لەبەر ئەوە بوو کە قەڵغانی کافرەکان بوون. ئه‌گه‌ر ئه‌فغانییه‌كمان كوشت بێت، یان بۆ مه‌به‌ستێكی گه‌وره بوو، یان بۆ ئیسلام بوو، یان بۆ جێبه‌جێكردنی شه‌ریعه‌ت بوو كه خوای گه‌وره له مه‌سه‌له‌ی تۆڵه‌كردنه‌وه‌دا (قیساس) رێگه‌ی پێداوه.
بیست ساڵ لەمەوبەر کەس لە ئەفغانستان نەیدەتوانی باسی شەریعەت بکات، ئەگەر قسەیان بکردایە یان زیندانی دەکران یان ئەشکەنجە دەدران! بەڵام ئەمڕۆ لە ئەنجامی جیهادی ئێمە، بانگهێشت بۆ خوای گەورە بە ئازادانە ئەنجام دەدرێت.
ئەگەر ئەمنیەت لە پێکهاتەی حکومەتدا نەبێت، ئەگەر کرۆنیزم و ئێتنۆسەنتریزم و زمانگەرایی لە فەرمانگەکاندا هەبێت، ئەمە ئەمنیەت نییە و دوای چەند ڕۆژێک ئەم حکومەتە نامێنێت. مەبەست لەم کارە دابینکردنی بەرژەوەندی تاکە کەسی هەندێک کەسە، وەک حکومەتی پێشوو.
پرەنسیپ لە سیستەمی ئیسلامیدا ئەوەیە مرۆڤ دەستبەرداری ئارەزووەکانی بێت و خۆی بە تەواوی ملکەچی شەریعەتی خودا بکات. ئەگەر خۆت لەگەڵ یاسادا نەگونجێنی، ئەوا ئەو بانگەشەی کە خۆت لەگەڵ یاسای خودادا دەگونجێنی، درۆیە!
ئەگەر بۆشایی لە نێوان زانا و فەرمانڕەواکاندا هەبێت، هەرگیز ئەمنیەت دابین ناکرێت. جیهادی خەڵکی ئاسایی لە جێبەجێکردنی حوکم و لێدوانی زانایاندایە.
من پێکهێنانی حکومەتی داهاتوو لە کۆبوونەوەیەکی ترەوە ڕایدەگەیەنێم و ڕاوێژ بە زانایان دەکەم کە کام مەولوی دەبێتە بەرپرسی کام وەزارەت و پارێزگایەک.
هیچ دەسەڵاتێک لە جیهاندا ئۆپەراسیۆنی سەربازی لە ئەفغانستان ئەنجام نادات. بەڵام پڕوپاگەندە و ئۆپەراسیۆنە دەروونییەکان بەردەوام دەبن. ئەوان هەوڵ دەدەن دووبەرەکی لە نێوان بەرپرسانی ئیمارەتی ئیسلامی (تاڵیبان) دروست بکەن و ئەگەر دووبەرەکی هەبێت ئەوا ئیمارەتەکە لەناو دەچێت. جیهان نایەوێت ئیمارەتی ئیسلامی سەربەخۆ بێت و دەیانەوێت کارەکان بە رێنمایی ئەوان ئەنجام بدرێت و دەستوەردان لە کاروباری ناوخۆمان بکەن.
تەنانەت ئەگەر بۆمبی ئەتۆمیش لەدژی ئێمە بەکار بهێنن، بە پێچەوانەی ویستی خودا هەنگاوێک لەگەڵ ئێوە نانێین.
ئەگەر لە وڵاتدا ئەمنیەت هەبێت، ئابووری خۆی دروست دەبێت. پشت بە هاوکاری دەرەکی مەبەستن، یەکبگرن و وڵاتی خۆتان بنیات بنێن.
وەبەرهێنەران لە چی دەترسن؟ وەرن هەندێک کۆمپانیا دروست بکەن و ئابووری باشتر بکەن.»
لێدوانی وشک و کۆنەپەرستانەی ڕێبەری تاڵیبان، بە بەراورد لەگەڵ لێدوانەکانی ڕابردووی بەرپرسانی دیکەی ئەم گرووپە، ئاماژەن بۆ دژایەتی و دووبەرەکی قووڵی نێوان بەرپرسانی تاڵیبان. مەلا هەیبەتوڵڵا هێشتا هەمان دیدگای داخراوی بەرامبەر بە جیهان هەیە و تەنانەت وڵاتانی دراوسێی ئەفغانستان و بەرپرسانی دیکەی تاڵیبانیش دژی ئەم بۆچوونە هەنگاو دەنێن و چاویان لە بنیاتنانەوەی پەیوەندییەکانیان لەگەڵ ئەمریکا و وڵاتانی دیکەی ڕۆژهەڵاتە. بەشێکی گرنگی لێدوانەکەی ڕێبەری تاڵیبان رەتکردنەوەی بیرۆکەی “دەوڵەتی گشتگیری ئەفغانستان” بوو. ئەم چارەسەرە بەزۆری لەلایەن وڵاتانی دراوسێی ئەفغانستان و بەتایبەت ئێرانەوە پێشنیار دەکرێت و تائێستا تاڵیبان هەڵوێستی خۆیان لەو بارەیەوە ڕوون نەکردووەتەوە. بەگشتی ئەفغانستان بەبێ بەشداریکردن و پاراستنی مافی هەموو نەتەوە و ئایینەکان هەمان ڕێبازی پەنجا ساڵی ڕابردوو دەگرێتەبەر و حکومەتی نوێی تاڵیبانیش لەم چوارچێوەیەدا بەدەر نییە.
لێدوانەکان