سەید حەسەن نەسروڵڵا: هیوای خەڵکی فەڵەستین بۆ ئازادی زیادیکردوو

لە سەرەتای قسەکانیدا سەید حەسەن نەسروڵڵا سڵاوی لەو دەیان هەزار کەسە کرد کە رۆژی رابردوو (هەینی) لە مزگەوتی ئەقسا کۆبوونەوە.

سکرتێری گشتی حزبوڵڵا وتیشی: پێویستە قوربانیدانی گەلی فەڵەستین ویژدانی مرۆڤ و موسڵمانان و هەموو ئازادیخوازانی ئەم جیهانە بجوڵێنێت.

ناوبراو وتیشی: ئەمریکا و ڕۆژئاوا و زایۆنیستەکان و هەموو ئەوانەی هاوکاریان بوون، لە جێگیرکردنی ڕژێمی داگیرکەر و پێدانی کلیلی ناوچەکە بەو رژێمە هەوڵیان دا.

ناوبراو ڕۆژی قودسی بە جەختکردنەوە لەسەر ڕاستی و شەرعییەتی پرسی فەلەستین و چەوساوەیی خەڵکی ئەم خاکە زانی و وتی: ئیمام خومەینی بەهۆی ڕەچاوکردنی ئەم بابەتە کە قودس چۆن ببێتە ناوەندی سەرنج و کردار و هیوای ئۆمەتی ئیسلامی، ڕۆژی قودسی ڕاگەیاند.

ناوبراو ئاماژەی بە لێدوانەکانی ڕێبەری باڵای شۆڕشی ئیسلامی ئێران لە ڕۆژی جیهانی قودسدا کرد و وتی: لێدوانەکانی ئایەتوڵڵا خامنەیی جەخت لە پابەندبوونی جدی و یەکلاکەرەوە لە پشتیوانیکردنی فەلەستین و بزوتنەوە خۆڕاگرییەکانی ناوچەکە دەکاتەوە.

ناوبراو لە بەشێکی دیکەی لێدوانەکەیدا، ئاماژەی بە سیاسەتی خۆڕاگری کۆماری ئیسلامی ئێران کرد و وتی: ئەگەر ئەمڕۆ ئێران بە ئەمریکا بڵێت کە پێشوازی لە ڕێگای سازان دەکات، ئایا ئەم گەمارۆ و پیلانانە [لە دژی ئێران] بەردەوام دەبێت؟ بە دڵنیاییەوە نەخیر.

سکرتێری گشتی حزبوڵڵا وتی: پرسی فەڵەستین بەشێکە لە ئایین و باوەڕ و کەرامەتی ئێمە، ئێمە نەتەوەیەکین کە ناتوانین واز لە ئیمان و باوەڕ و ڕێز لە پرسی فەلەستین بهێنین.

نەسروڵڵا دووپاتیکردەوە کە ڕێڕەوی بێ هیوایی لە فەلەستین شکستی هێناوە و وتی: ئێستا هیوای خەڵکی فەڵەستین بۆ ئازادی زیادیکردووە و کاتی لەبیرکردن و بێ هیوایی کۆتایی هاتووە.

ناوبراو وتیشی: پرۆسەی ئۆپەراسیۆنە جیهادییەکان لە ناو زەوییەکانی ساڵی ١٩٤٨ و کەنارەکانی ڕۆژئاوا و بەتایبەتی ئۆپەراسیۆنی تاکەکەسی، ترسێکی زۆری لەم ڕژێمدا دروستکردووە.

نەسروڵڵا دووپاتیکردەوە: ئۆپەراسیۆنە تاکەکەسییەکان، ئەمنیەتی لاواز و ناسکی ئەو رژێمە و هەروەها لاوازی دەزگا ئەمنییەکانی ئیسرائیلی بۆ ناسینەوەی موجاهیدینی پیشان دا.

سەید حەسەن نەسروڵڵا لە بەردەوامی ئەم ڕێبازە، جیهادی سەربازی بە تاکە ڕێگا زانی و وتی ئەم ڕێبازە سەلماندویەتی کە ڕژێمی زایۆنیستی تێکدەشکێت و ئەوە نییە کە هەمیشە زاڵ بێت و ئێمە پێشتر چەندین جاری یەک لەدوای یەک ئەو ڕژێمەمان تووشی شکست کردووە.

سکرتێری گشتی حزبوڵڵا وتی، گرنگترین دەستکەوتی ئۆپەراسیۆنە تاکەکەسییەکان ئەوەیە کە بە پێچەوانەی تێڕوانینی زایۆنیستەکانەوە سەلمێنراو کە ئاسایش و داگیرکاری پێکەوە ناگونجێت.

ناوبراو هەروەها وتی: زانیاریم هەیە کە ئێران پەیامی بۆ وڵاتانی هاوئاهەنگی رژێمی زایۆنیستی ناردووە کە هەر دەستدرێژییەک لەلایەن ئەو وڵاتانەوە بۆ سەر ئێران، وەڵام دەدرێتەوە و ئەم پەیامە بە ئیسرائیلیش گەیشتووە.

سەرۆکی حزبوڵڵای لوبنان لە مانۆڕێکی بێدەنگی هێزەکانی حزبوڵڵا لە ماوەی چەند هەفتەی ڕابردوودا هەواڵی دایەوە و وتی هەر گێلایەتییەک لەلایەن ڕژێمی زایۆنیستیەوە، ڕوبەڕوی وەڵامدانەوەیەکی ڕاستەوخۆ و خێرا دەبێتەوە.