هۆشداری توندی تاڵیبان بە تاجیکستان و ئۆزبەکستان

چوار شه‌ممه‌ 12 كانونی دووه‌م 22 - 23:52
https://kurdish.iswnews.com/?p=5862

مەلا محەممەد یەعقوب موجاهید، وەزیری بەرگری تاڵیبان داوای گەڕانەوەی فڕۆکە جەنگییەکان و هەلیکۆپتەرەکانی حکومەتی پێشووی ئەفغانستانی لە وڵاتانی تاجیکستان و ئۆزبەکستان کرد.

هەواڵەکانی جیهانی ئیسلام؛ مەلا محەممەد یەعقوب موجاهید، وەزیری بەرگری تاڵیبان لە کۆنفرانسی فڕۆکەوانان و ئەندازیارانی هێزی ئاسمانی سوپای ئەفغانستان، هۆشداری بە تاجیکستان و ئۆزبەکستان دایەوە کە دەبێت فڕۆکە جەنگییەکان و هەلیکۆپتەرەکانی ئەو وڵاتە بگەڕێننەوە. موجاهید لە بەردەوامیی هەڕەشەکانیدا وتی: ئەگەر تاجیکستان و ئۆزبەکستان ئەم کارە نەکەن، ڕووبەڕووی کاردانەوەی توندی تاڵیبان دەبنەوە.
ناوبراو وتیشی: «ڕەنگە ئێمە لاواز بین، بەڵام بێ دەمار نین و هەموو ئەو هەلیکۆپتەر و فڕۆکانەی خۆمان وەردەگرینەوە کە لە کاتی ڕووخانی حکومەتی پێشوودا ڕوویان لە تاجیکستان و ئۆزبەکستان کردووە.»

بە وتەی بەرپرسانی تاڵیبان، هێزی ئاسمانی ئەفغانستان بە گشتی ٢٨٩ هەلیکۆپتەر و فڕۆکەی سەربازی هەیە کە لەئێستادا ٥٠ فڕۆکەیان توانای ئەنجامدانی ئۆپەراسیۆن و فڕینیان هەیە. هەروەها لە کاتی ڕووخانی حکومەتی پێشوودا ٦٢ هەلیکۆپتەر و فڕۆکەی سەربازی پەنایان بۆ تاجیکستان و ئۆزبەکستان بردووە.

هاوکات لەگەڵ هەڕەشەکەی تاڵیباندا، “ئیمامعەلی رەحمانۆف” سەرۆک کۆماری تاجیکستان لە دوایین کۆبوونەوەی هاوبەشی وڵاتانی ئەندام لە ڕێکخراوی پەیمانی ئاسایشی کۆمەڵ، بەبیانووی بارودۆخی ئاڵۆزی ئەمنی و کێشە ناوخۆییەکانی تاڵیبان، داوای دروستکردنی پشتێنێکی ئەمنی لە سنوورەکانی تاجیکستان و ئۆزبەکستان لەگەڵ وڵاتی ئەفغانستانی کردووە.

گرژییەکانی نێوان وڵاتانی ئاسیای ناوەڕاست لە کاتێکدا دێت کە وەزارەتی بەرگری تاڵیبان لە ئامادەیی ٨٠ هەزار سەرباز بۆ بەرگری کردن لە ئەفغانستان هەواڵی داوەتەوە.

بەشی بکە:
لێدوانەکان

وەڵامێک بنووسە

پۆستی ئەلکترۆنیکەت بڵاو ناکرێتەوە .